Let's make a difference

نبدأ التغيير من أنفسنا ومن بعدها نوسع الدائرة، لا يرمي كل منا ذنبه وخطأه على غيره بل يغير ما بنفسه اولا

احداث الفرق والتغيير بالمجتمع له عدة نواحي، انا شخصيا بحب اني اعمل خير، كيف؟ مو ضروري بالمصاري، وخاصة انو بمجتمعنا الغريب بس حدا يحكي بسيرة المصاري الكل بيهرب وبيقلك ما معي

عمل الخير يعني مثلا تتبسم بوجه اخيك المسلم (تبسمك في وجه اخيك صدقة) هاد حديث نبوي شريف

عمل الخير يعني اماطة الاذى عن الطريق، مو تترك صندوق الكرتون بنص الشارع وتقول ما دخلني او داخل المحلات نترك الاواعي مرمية على الارض ونقول ما دخلنا، هاد كمان تحت بند اماطة الاذى عن الطريق

عمل الخير كمان ممكن يكون انو نحط صحن مي عالشباك مشان الطيور بهالصيف تشرب وتدعيلك

عمل الخير انك تدل شخص شفته حايص بالطريق وغالبا ضايع، معلش ننزل من برجنا العاجي وندله عالطريق، ويا ريت ما نعتبره فضول لأن لو شي تاني كان قتلنا حالنا لنعرف شو صاير من شدة الفضول

في كتير شغلات تعتبر عمل خير ويا ريت ما نعتبر انو لما شخص يفسد على بنت فلان او مرت فلان او زوج فلانة انو عمل خير، من ايمتى كان عمل الخير انو نفتن على بعض ونخرب البيوت؟ لو فعلا النية بهالموقف هي عمل الخير ممكن نتجه لصاحب العلاقة شخصيا وننصحه

فعل الخير مفهوم كتير كبير وفي إله ألف طريقة وطريقة، بتمنى يوصل صوتي وفكرتي للعالم ونبدا التغيير لنحدث الفرق